चेहरा स्कॅन करून होणार ओळख; कागदी ओळखपत्र बाळगण्याची गरज नाही, आधार केंद्रावरील चकरा वाचणार.
आधार केंद्रावरील चकरा आता थांबणार
आधार कार्डवरील पत्ता, फोन नंबर किंवा इतर माहितीमध्ये बदल करण्यासाठी वारंवार आधार सेवा केंद्रात जाण्याच्या त्रासातून नागरिकांची लवकरच सुटका होणार आहे. भारतीय विशिष्ट ओळख प्राधिकरणाने (UIDAI) एक नवीन मोबाईल ॲप्लिकेशन (ॲप) सादर केले आहे, ज्यामुळे आता अनेक महत्त्वाचे बदल घरबसल्या एका क्लिकवर करणे शक्य होणार आहे.
चेहरा स्कॅन करून ओळख, कागदी कार्डाची गरज नाही
UIDAI ने तयार केलेले हे ॲप अँड्रॉइड आणि आयओएस (iOS) दोन्ही प्रणालींसाठी उपलब्ध करून देण्यात आले आहे. या ॲपचे सर्वात मोठे वैशिष्ट्य म्हणजे, यात चेहरा स्कॅन करून ओळख पटवली जाईल. त्यामुळे, हे ॲप तुमच्या मोबाईलमध्ये असेल, तर तुम्हाला स्वतंत्रपणे आधार कार्डाचे कागदी ओळखपत्र बाळगण्याची गरज भासणार नाही; मोबाईलमधील ई-आधारच ओळखपत्र म्हणून काम करेल.
पत्ता बदलण्यासह अनेक कामे घरबसल्या
सध्या आधार कार्डमध्ये मोबाईल क्रमांक बदलण्यासारख्या काही सुविधा ऑनलाईन उपलब्ध असल्या तरी, पत्ता किंवा इतर वैयक्तिक माहितीत बदल करण्यासाठी नागरिकांना आधार सेवा केंद्रात जावे लागते. या नवीन ॲपमुळे ही पायपीट आता थांबणार आहे. अनेक महिन्यांच्या यशस्वी चाचण्यांनंतर सरकारने हे ॲप सर्वसामान्यांसाठी खुले करण्याचा निर्णय घेतला आहे.
कृत्रिम बुद्धिमत्तेचा वापर, पण एकदा केंद्रावर जाणे आवश्यक
या ॲपच्या निर्मितीमध्ये कृत्रिम बुद्धिमत्तेचा (Artificial Intelligence) वापर करण्यात आला आहे. विशेषतः फेस आयडी तंत्रज्ञानाच्या आधारे वापरकर्त्याची ओळख ऑनलाइन पद्धतीने पटवली जाईल. मात्र, ज्या नागरिकांनी अद्याप आपले बोटांचे ठसे (बायोमेट्रिक) आणि डोळ्यांच्या बुबुळांचे स्कॅनिंग (Iris Scan) केलेले नाही, त्यांना सुरुवातीला एकदा आधार केंद्रावर जाऊन ही प्रक्रिया पूर्ण करावी लागेल.
भविष्यात पॅनकार्ड, पासपोर्टही ऑनलाईन उपलब्ध होणार
या ॲपच्या माध्यमातून भविष्यात केवळ आधारच नाही, तर जन्माचा दाखला, पॅनकार्ड, पासपोर्ट आणि मनरेगा ओळखपत्रासारखी महत्त्वाची कागदपत्रेही ऑनलाईन उपलब्ध करून देण्याची सरकारची योजना आहे. यामुळे नागरिकांचा वेळ वाचणार असून, शासकीय प्रक्रियांना अधिक गती मिळणार आहे.