नोव्हेंबर अखेरीस ढगाळ वातावरण, डिसेंबरमध्ये थंडीचा जोर वाढणार; बंगालच्या उपसागरातील कमी दाबाच्या क्षेत्राचा महाराष्ट्रावर काय परिणाम?
राज्यात सध्या कोरडे हवामान आणि वाढती थंडी जाणवत असून, येत्या काळात थंडीचा जोर आणखी वाढणार असल्याचे संकेत हवामान अभ्यासक डॉ. मच्छिंद्र बांगर यांनी दिले आहेत. दर रविवारी साप्ताहिक अंदाज देणाऱ्या डॉ. बांगर यांनी, नोव्हेंबरच्या अखेरीस राज्यात पावसाळी वातावरण तयार होण्याची आणि डिसेंबर-जानेवारी महिन्यात तीव्र थंडीची लाट येण्याची शक्यता वर्तवली आहे.
महाराष्ट्रात थंडीची लाट येणार
सध्या महाराष्ट्रात हवामान कोरडे असल्याने थंडीचा प्रभाव वाढत आहे. उत्तर भारतातून येणाऱ्या थंड वाऱ्यांमुळे येत्या काळात थंडीचा कडाका आणखी वाढणार आहे. डॉ. बांगर यांच्या मते, उत्तर भारतात एक प्रभावी वेस्टर्न डिस्टर्बन्स (WD) दाखल होण्याची शक्यता असून, त्यामुळे थंड वाऱ्यांचा प्रवाह महाराष्ट्राकडे येईल. परिणामी, नोव्हेंबर, डिसेंबर आणि जानेवारी हे तीन महिने राज्यात तीव्र थंडीचे राहतील. विशेषतः १५ डिसेंबर ते १५ जानेवारी हा काळ ‘गर्भ थंडीचा’ असेल, ज्यामध्ये थंडीचा जोर सर्वाधिक राहील.
बंगालच्या उपसागरात चक्रीवादळाचे संकेत
बंगालच्या उपसागरात अंदमान-निकोबार बेटांच्या दक्षिणेला कमी दाबाचे क्षेत्र तयार होत आहे. ही प्रणाली अधिक तीव्र होऊन तिचे डिप्रेशन आणि पुढे चक्रीवादळात रूपांतर होण्याचे संकेत आहेत. सध्याच्या अंदाजानुसार, या प्रणालीचा मार्ग चेन्नई, विशाखापट्टणमच्या दिशेने किंवा केरळमार्गे अरबी समुद्राकडे जाण्याची शक्यता आहे. त्यामुळे या प्रणालीचा महाराष्ट्रावर थेट परिणाम होणार नाही.
राज्यात ‘या’ तारखांना पावसाची शक्यता
बंगालच्या उपसागरातील प्रणालीचा थेट परिणाम नसला तरी, त्याच्या प्रभावामुळे राज्यात ढगाळ वातावरण निर्माण होऊन पावसाची शक्यता आहे. २३, २४ आणि २५ नोव्हेंबरच्या दरम्यान दक्षिण कोकण आणि पश्चिम महाराष्ट्रात ढगाळ हवामान राहून हलक्या पावसाची शक्यता आहे. त्यानंतर, ३० नोव्हेंबरच्या सुमारास आणखी एक नवीन प्रणाली विकसित होत असल्याने पूर्व मराठवाडा आणि विदर्भात पावसाळी वातावरण निर्माण होऊ शकते. जेव्हा-जेव्हा ढगाळ वातावरण तयार होईल, तेव्हा थंडीचे प्रमाण तात्पुरते कमी होईल, असेही डॉ. बांगर यांनी स्पष्ट केले.
डिसेंबर महिन्याचा हवामान अंदाज
डॉ. बांगर यांच्या अंदाजानुसार, डिसेंबर महिन्यात राज्यात फारसे पावसाळी वातावरण दिसणार नाही. महिनाभरात हवामान बहुतांशी कोरडे आणि थंड राहील. केवळ महिन्याच्या शेवटच्या आठवड्यात काही ठिकाणी पावसाची शक्यता आहे. मात्र, एकूणच डिसेंबर महिना कडाक्याच्या थंडीचा असेल.
नागरिकांसाठी महत्त्वाचा सल्ला
येत्या काळात थंडीचा जोर वाढणार असल्याने, विशेषतः वृद्ध, लहान मुले, तसेच हृदयविकार आणि सांधेदुखीचा त्रास असलेल्या रुग्णांनी स्वतःची विशेष काळजी घ्यावी. शेतकऱ्यांनीही आपल्या जनावरांना थंडीपासून वाचवण्यासाठी योग्य ती खबरदारी घ्यावी, असे आवाहन डॉ. बांगर यांनी केले आहे.